LAOAG CITY – Nangrugin ita nga aldaw, Marso 25, 2026, ti pormal a panagdengngeg iti impeachment case kontra ken ni Vice President Sara Duterte iti House Committee on Justice.
Iti baet ti saan a panagatendar ti Bise Presidente, intuloy ti komite ti panangiprisentar kadagiti ebidensia ken testimonia manipud kadagiti complainant.
Dua nga impeachment complaints ti binigbig ti komite kas umdas iti porma ken substansia a nakaiyataday iti maipagarup a panaglabsing iti Konstitusion ken saan nga husto a panagusar ti bileg.
Nangipatulod ti opisial a sungbat ni Duterte iti babaen ti legal team-na nga agkidkiddaw nga ibasura dagiti kaso gapu iti maipagarup a kinakurang ti pagibasaran.
Inbatad ni Committee Chair Gerville Luistro, tuloy ti proseso maiyallubog iti nakailanad iti Konstitusion uray awan ti Bise Presidente.
Manamnama nga agpaut ti panagdengngeg kabayatan a maidatdatag dagiti dokumento ken testimonia ti saksi ken no makakita ti umdas nga ebidensia, mabalin nga isubmitir ti komite ti report iti plenario ti Kamara de Representantes para iti panagbubutos no ituloy ti impeachment trial iti Senado.
