LAOAG CITY – Kinumpirmaran ni Senate Blue Ribbon Committee Chairperson Panfilo “Ping” Lacson a maituloy ti panagdengngeg iti senado kadagiti maipagarop a maanomalya flood control projects intono Enero 19 ita a tawen.
Segun ken ni Lacson, mangrugi daytoy iti oras ti ala-una ti malem, no sadinno a matratar iti panagdengngeg ti maipagarop a panangibabawi dagiti dati nga opisyal ti Department of Public Works and Highways (DPWH)-Bulacan a da Brice Hernandez ken Henry Alcantara kadagiti nagbalin a rakurak da iti senado.
Inbatad ti senador a nupay nadakamat ti Department of Justice (DOJ) nga awan ti pormal a naisayangkat a panangibabawi ni Alcantara kadagiti nagbalin a rebelasyon na a maipagarop a maanomalya a proyekto iti imprastrakturatigobyerno iti naisayangkat a panagdengngeg iti senado idi Setyembre 2025, pagsasaritaan paylaeng no ania ti mabalin nga agbalin a pannusa no ibabawi dagiti nasao a dati nga opisyal ti Department of Public Works and Highways kadagiti sinapataan da a rakurak iti blue ribbon committee.
Inpetteng pay ni Lacson a lawlawagan ti senado iti Department of Justice no nangisumitir ti counter affidavit kadagiti inibbatan a sarita dagiti dati nga opisyal ti Department of Public Works and Highways, no sadinno nga inpasingked ti senador nga ipangato ti agbalin a pannusa no mapaneknekan ti panagsanud dagitoy.
Kabayatanna, inlawlawag ni Lacson a no agsanud da Alcantra ken Hernandez iti panagbalin da a testigo ket mabalin paylaeng nga ituloy ti isaysayangkat nga imbestigasyon iti senado gapu ta adda pay dagiti dadduma a makaitudo kadagiti karaman iti maanomalya a flood control projects kas ti money trail wenno panaggaraw ti kwarta a kasingin, adda ti ammo wenno konektado iti testimonya dagiti dati nga opisyal ti Department of Public Works and Highways a mabalin nga ikonsiderar ti Department of Justice wenno Ombudsman tapno imbestigaren.
Mainaig iti daytoy, paawagan ti blue ribbon committee da dati a Department of Education (DepEd) undersecretary Trygve Olaivar, dati a DPWH secretary Manuel Bonoan ken dadduma pay a resource person a saan a nagatendar kadagiti immuna a panagdengngeg ken patuludan da ti subpoena dagiti saan manen nga agatendar idinto a panunuten da pay no imbitaran iti panagdengngeg ni Batangas 1st District Representative Leandro Leviste mainaig iti panangtratar na ti nasao a “Cabral files”.
