LAOAG CITY – Kalikagum ni Gob. Matthew Marcos Manotoc a mairubuat ti alisto a panagdur-as ti ekonomia, turismo, agrikultura, renewable energy ken dadduma pay a negosio ditoy Ilocos Norte.
Kunana a maysa kadagiti nabayagen a tarigagayna a maitandudo ket ti renewable powered data center gapu ta daytoy ket agkasapulan ti adu nga enerhia ken agsobsobra ti renewable energy ditoy probinsia.
Malaksid iti daytoy, inbatadna a pursigido a mangitandudo iti pannakaiyestablisar ti renewable powered cold storage a mabalin a mausar a renewable energy ken cold storage a dakkel a makatulong kadagiti mannalon a mangiyatiddog iti kinapaut dagiti maapitda a produkto iti kataltalonan.
Inbatadna a kabulbulon daytoy ti pannakaipasdek ti storage product processing, bagsakan wenno trading center a dakkel a tulong iti pannakailako iti napintas a presyo kadagiti produkto dagiti mannalon ditoy probinsia.
Mainaig iti daytoy, mangnamnama ti Gobernador a makatulong ti pinagturongda idiay Hawaii ken Los Angeles, California iti pannakatun-oy dagitoy a kalikagumna a makatulong iti panagbaliw ti panagbiag dagiti mannalon ditoy Ilocos Norte.
Innayonna a planona nga idiaya kadagiti investors idiay Hawaii ken Los Angeles, California ti Private Public Partnership a ti lote a pagpatakderan dagitoy ti negosio ket manipod ti probinsia.
