LAOAG CITY – Kumpirmadon a ditoy Ilocos Norte ti pakaisayangkatan ti panagensayo ti Phil. National Volleyball Team kas panagsagana da kadagiti pakipagpartisiparan da a kompetisyon ita a tawen.
Segun ken ni Mr. Faivo Bartolome, Provincial Sports Consultant, manamnama a sumangpet ti Men’s ken Women’s team iti masungad a lawas.
Immun-una ngem iti daytoy, inpakaammo ni PNVF Pres. Ramon Tats Suzara ken ni Gob. Matthew Marcos Manotoc a kalikagum na a ditoy probinsia ti pagensaywan dagiti nasao a team kalpasan a nakita na a natalged ti probinsia para kadakuada.
Inpalgak ni Bartolome nga immuna a naiskedyul ti isasangpet dagiti nasao a team ditoy probinsia ita a lawas.
Nupay kasta, kalikagum ti Phil. National Volleyball Federation a makumpleto nga umuna dagiti umaayam ti bakunada kontra COVID-19.
Mainaig iti daytoy, in pasigurado ni Mr. Perry Martinez, consultant ti Provincial Economic Group a nakasaganan dagiti dua a lugar a manamnama a pagensaywan dagiti nasao a team kas iti Ilocos Norte Centennial Arena ken ti Bacarra gym.
