LAOAG CITY – Itultuloy ti House Committee on Good Government and Public Accountability ti panagdengngeg mainaig iti pananggastos ti pondo ti Office of the Vice President (OVP) ken iti Deparment of Education (DepED) partikular ti confidential ken intelligence funds iti babaen ti liderato ni Vice President Sara Duterte.
Inpetteng ni Manila Representative Joel Chua, ti chairman ti komite a karbengan ti umili a maamoan no sadinno ti nakaipanan ti pondo manipod iti kaban ti umili.
Ginutigot ni Chua ti dadduma nga empleado ti gobierno nga adda ti pakainaigan ken ammona maipanggep kadagiti transaksiyon nga im-imbestigaren ti kamara de representantes a dumatag ken umasideg iti House Blue Ribbon Committee tapno ibutaktak ti impormasyon da.
Kuna ni Chua a babaen iti daytoy ket maamoan ti kinapudno mainaig iti nakausaran ti pondo.
Inpetteng ni Chua a saan a rumbeng a dagiti umili ti mangibaklay kadagiti buwis isut gapuna a rumbeng a maamoan ti kinapudno.
Inpaganetget pay ti Kongresista a ti Kamara de representantes ti guardian ti public funds isut gapuna a rumbeng a maamoan ti publiko no sadinno ti pakaikabkabilan ti pondo ken no usto ti nakausaran na.
