LAOAG CITY – Nagpalagip ti Department of Energy (DOE) iti publiko a mapalubusan dagitoy a gumatang kadagiti produkto a petrolyo usar ti fuel-grade a drum wenno containers, basat dagitoy ket usaren iti lehitimo nga operasyon ken sumursurot kadagiti agdama a pagannurutan iti kinatalged iti panag-dispense ti fuel.
Segun iti Department of Energy, ti kastoy a wagas ti panaggatang ket masansan nga ar-aramiden dagiti sektor nga agkasapulan ti ado a suplay para iti operasyon da.
Karaman ditoy dagiti bangka a pagkalap ken marine equipment operators, sea transport services, dagiti ospital nga agus-usar ti generator set, dagiti local government unit (LGU), dagiti agus-usar ti makinaryan a pang-agrikultura, telecommunications facilities, port service transport units, ken dadduma pay a negosyo nga addaan ti lehitimo a pagkasapulan ti supply ti langis.
Nupay kasta, inpetteng ti ahensya a ti kaado dagiti gatgatangen a langis ket masapol a maiyataday laeng iti gagangay a makonsumo ken aktuwal a pagkasapulan ti operasyon ti gumatgatang.
Nagpalagip ti Department of Energy a no ado unay ti gatangen a produkto wenno langis ket mabalin a maipadalan iti beripikasyon tapno masigurado nga awan ti mapaspasamak nga hoarding wenno panagilemeng ti supply.
Binalakadan met ti Department of Energy dagiti fuel retailer nga agbalin a naannad iti panagiproseso kadagiti kastoy a transaksyon, aglalo no ti kaado dagiti gatgatangen ket saan nga agtugma iti pagkasapulan dagiti aggatang.
