LAOAG CITY – Inrekomendar ni Dr. Norman Rabago, provincial COVID-19 consultant, a gumatang kadagiti brand ti rapid test kits nga inaprobaran ti Food and Drug Administration.
Kuna na nga adda dagiti brand dagiti rapid test kits nga inaprobaran ti FDA a mabalin a mausar para kadagiti kayat na ti dumalan iti rapid testing.
Daytoy ket gapu ti pannakaipatungpal ti pammilin nga ipresentar dagiti APOR ti negatibo a resulta da iti RT-PCR test wenno Rapid Test ken mangitugot iti bukod a rapid test kits seknan ti panakasolbar iti parikut iti mabayadan para iti rapid testing.
Inlawlawag na a saan nga akseptaren wenno usaren dagiti eksperto wenno doktor dagiti rapid test kits a saan nga inaprobaran iti FDA.
Kuna na a para kadagiti APOR nga agpapaay kadagiti pribado a kompanya ket kasapulan a dumalan da iti rapid test wenno RT-PCR kadagiti ospital wenno laboratoryo nga accredited iti Department of Health.
Segun kenni Dr. Rabago, no maymaysa laeng ti dumalan iti testing ket nangin-ina iti mabayadan.
Nupay kasta iti presyo ti Rapid test kits, ket mapatta-patta nga agbalur iti 700 a pisos agingga iti 1,600 a pisos ken kitaen a naimbag no inaprobaran ti FDA kasta met kadagiti tampered ti label na.
Kuna na a masapul nga iyuswat ti DOH accredited laboratory ti testing para kadagiti maseknan.
Indiaya ti gobyerno probinsyal ti panangitugot dagiti maseknan tui bukod da a rapid test kits ken agturong iti DPWH quarantine facility idinto a dagiti personnel ti Provincial Health Office ti mangiyuswat ti rapid anti-body testing kadagiti empleyado.
Mangnamnama ni Rabago a maiyestablisar ti testing station ditoy probinsya para kadagiti sumrek nga APOR.
Nasuspenso met ti pannakaipadalan iti testing dagiti personnel ti Cargo Trucking Enterprises a kangrunaan a sumsumrek ditoy probinsya.
