LAOAG CITY – Inbatad ni Police Lt. Mauel Ordonio, chief of police ti PNP-Pasuquin nga addan ti person of interest iti gandat a pannakahold-up ti maysa a babai iti remittance center iti nasao nga ili.
Ummuna iti daytoy, kinumpirmaran ni Ordonio nga agpayso ti nagwaras iti social media a ladawan a panangipaturong ti lalaki ti paltog iti maysa a babai.
Segun kenni Ordonio, iti inisyal a panagimbestigar da nga agrikep kuman ti pasdek idi kellaat a pinaturungan ti lalaki ti paltog ken inbaga na ti “hold-up”.
Gapo iti daytoy, nagikkis ti babai ken ditoy a dagus a nagtartaray ti suspek.
Patyen ni Ordonio a ti lalaki ket maysa a “newbie” wenno damdamo na ti agarid iti kastoy.
Iti agdama ket agtultuloy latta ti naun-uneg nga imbestigasyon dagiti otoridad seknan iti nadakamat a pasamak.
