LAOAG CITY – Ipawil paylaeng ti Greece ti panagibiyahe ti karnero ken kalding iti intero a pagilian tapno malapdan ti panagwaras ti contagious infection a naawagan ti “goat plague”.
Basar iti agriculture ministry, ti nasao a baro nga infection cases ket na-detect iti central Larissa region ken iti Corinth.
Mabigbig pay ti nasao a virus kas Peste des Petits Ruminants (PPR), a mabalin a mangpatay ti 80% agingga iti 100% nga infected animals.
Nupay kasta, inpasigurado ti Agriculture ministry a saan a makaapektar ti nasao a sakit iti tao.
Innayon ti Agriculture ministry a naimpormaran da aminen dagiti livestock farmers, cheesemakers, slaughterhouse owners ken feed suppliers seknan iti baro a naipatungpal a restrictions iti intero a pagilian.
Iti agdama ket manarimaan ti imbestigasyon tapno maamoan no nagtaudan ti outbreak.
Naamoan nga umaboten ti 7 ribo nga animal ti napapatay idiay Greece sipud naduktalan ti sakit idi Hulyo 11 ita a tawen.
Ti Greece ti kaadoan ti kalding iti Europa ken dagiti gatas manipod iti kalding ken karnero ket isu ti maus-usar iti panagaramid ti feta cheese, ti maibilang a trademark Greek product.
