LAOAG CITY – Pabor ni Fire Supt. Floro Obrero, firemarshall iti Bureau of Fire Protection (BFP) ditoy probinsya iti inrakurak ni Presidente Rodrigo Duterte a masapol nga agiggem ti paltog dagiti personnel ti BFP.
Inbatad na a dakkel a tulong daytoy kadakuada tapno maprotektaran da ti bukod da a bagi no adda ti mabalin a pakairisgoan da.
Inpalagip na a saan a maliklikan nga adda dagiti saan a mapakpakadaan a pasamak no adda dagiti respondean da ken kasapulan a protektaran da met ti bagida.
Maragsakan ni Obrero gapu ta madlaw nga ipatpateg ida ni Presidente Duterte gapu ta ado dagiti plano na a pagsayaatan ken pakabenepisyaran da.
Kabayatanna, kuna ni Obrero nga 60 a porsiento kadagiti kameng ti BFP ket nagturpos ti BS Criminologist ken no naan-anay a maipatungpal ti kalikagom ti presidente ket masapol a dumalan da latta ti seminar tapno makaala da ti lisensya nga agiggem ti paltog.
Malaksid ti daytoy, mabalin to payen ti agtiliw dagiti kameng ti BFP kadagiti wanted person wenno dagiti agaramid ti mailabsing ti paglintegan iti masakupan da a lugar.
