LAOAG CITY – Inreport ni Bombo International Correspondent Keneth Garvida, taga San Nicolas, Ilocos Norte ngem agdama nga agnanaed idiay Colorado, USA nga agtultuloy pay laeng ti panagimbestigar dagiti otoridad mainaig iti napasamak a pammaltog iti supermarket iti Colorado a nakatayan ti 10 a tattao.
Ti suspek ket nagtalinaed iti kustodyar dagiti otoridad ngem agpapan ita ket saan pay a masinunuo no ania ti motibo iti napasamak a pammaltog.
Mainaig iti daytoy, saan a pabor ni Garvida iti kayat a mapasamak ni US President Joe Biden a mapawilan ti umili a gumatang ti paltog kalpasan ti napasamak a krimen.
Inpetteng na a napateg kadakuada ti maaddaan ti paltog tapno adda ti pangsalaknib da ti bukod da a bagi no kasapulan kas koma no adda ti mapan agtakaw iti balay da ken dadduma pay.
Innayon na a no agtawag da pay laeng ti 911 ket nabayag unay isut gapuna a masapol nga adda latta ti armas da.
Inpetteng na a nasaysayaat no adda ti maiwayat a background check para kadagiti gumatang ken no adda ti Mental health ti maseknan ket saanen a lakwan pay ti paltog.
