LAOAG CITY – Saan nga immanamong dagiti building officials kadagiti nagduduma a lokal a gobierno iti kalikagom ti Sang Panlalawigan a mairaman dagiti pribado nga indibidual nga agpatakder ti building a mangipasa paylaeng ti proof of purchase ti sand and gravel kadagiti lehitimo a source dagitoy nga aggregates.
Segun ti building official ti ili ti Sarrat, dagiti proyekto ti gobierno ket irequire-da dagiti contractor a mangala ti quarry certificate iti probinsia ngem iti pribado ket saan gapu ta no ibagada a saan da nga ikkan ti occupancy permit no awan ti maipakita da a quarry permit.
Kunana a maisalungasing daytoy iti building code of the philippines, under section 306 a nakaipalaunan dagiti rason no apay a saan da nga ikkan ti building permit ken occupancy permit dagiti agpatakder ti building.
Inpetteng na a no aramiden da daytoy possible ti makabasol da.
Mainaig iti daytoy, inlawlawag ni Bokal Rafael Medina a daytoy ket supplementary documentary para iti panagkolektar ti extraction fee, ken no maaprubaran ket maikkan met ti occupancy permit babaen ti panagpinnirma ti Memorandum of Agreement ti Local Chief Executive ken to gobernador ti probinsya.
Inpasigurado na pay nga awan ti pakabasolan da gapu ta ti laeng kayatda a mapasamak ket maamoan no legal metlaeng ti paggapgapwan dagitoy nga aggregates nga usaren dagiti agpatakder ti building.
Nupay kasta, saan latta nga inanamongan dagiti building officials kadagiti nagduduma a lokal a goboerno gapu ta ipetpetteng da a no proyekto ti gobierno ket mabalin da nga aramiden daytoy, ngem saan a mabalin kadagiti pribado nga indibidual.
