LAOAG CITY – Inaprobaran ti Sang. Panlalawigan ti naisingasing nga ordinansa a mandatory wenno inkapilitan a panagusar ti high visibility vest iti ditoy Ilocos Norte.
Daytoy ti impakaammo ni ABC Federated President Elmer Faylogna, chairman ti Committee on Transportation ti Sanguniang Panlalawigan.
Segun ken ni Faylogna masapol nga amin a drayber ken riders ti motorsiklo, tricycle, bisikleta, electric bike, kuliglig, ken tractor ket agisuot iti high visibility vest, pakairamanan dagiti backride da.
Innayonna a saan laeng a kadagiti national highway ti pagsitaan da no di ket pakairamanan kadagiti nagduduma a barangay, no sadinno a kabinnulig da dagiti opisyal ti barangay.
Ti ordinansa a pinagisuot ti high visibility vest ket maipatungpal iti kada aldaw mangrugi iti alas sais iti rabii agingga ti alas singko ti bigat.
Impakaammona a ti siasinno man nga agsalungasing iti daytoy a pagannurotan ket mamulta iti 500 a pisos kas first offense, 1000 a pisos para iti second offense, bayat a ti third offense ket 1,500 a pisos, ngem kunana a no awan ti pagbayad dagiti agsalungasing ket mabalin da ti ag-community service iti barangay da.
Kabayatanna, binallaagan ni Faylogna ti publiko nga agannad iti panagmaneho, agusar kadagiti safety gears pakairamanan ti high visibility vest, ken sumurot kadagiti pagannurotan ti trapiko.
Maipalagip a namunganay daytoy iti Sanguniang Panlalawigan ta daytoy ti maysa nga agbalin a wagas ti pannakalimitar kadagiti vehicular incident a mapaspasamak iti probinsya.
