LAOAG CITY – Adu nga exotic food dagiti kangrunaan a maidasdasar kadagiti nagduduma a pasdek panganan idiay Wuhan City, China.
Daytoy ti inbatad ni Dr. Loida Valenzuela, provincial veterinarian ti Ilocos Norte mainaig iti panagtaud ti novel corona virus.
Kuna na nga adda pay dagiti aglaklako a dagiti lako da ket wild animals kas kadagiti uleg, tekka, kurarapnit ken dadduma pay.
Inbatad ni Valenzuela a posible a naggapu kadagiti wild animals ti nasao a virus gapu ti kaadu dagiti mailaklako iti nasao a siudad.
Inlawlawag na a posible nga adda kadagiti ayop ti nasao a virus ngem saan a makita ti panagsakit wenno pannakaapekto da.
Inbunannag ni Valenzuela nga adda ti tallo a klase a pakaibilangan dagiti ayop kas kadagiti wild animals, food animals a mailaklako iti merkado ken dagiti Pet Animals.
Iti mainaig a damag, saan a direkta a sinungbatan ni Valenzuela ti saludsod mainaig iti kinadalus dagiti adda iti kabakiran ngem dagiti matartaraken nga ayop.
Segun kenkuana, mabalin a kunaen dagiti dadduma a nadalus dagiti wild animals ngem inyarig na iti panagtaod ti African Swine Fever a naggapu iti alingo wenno baboy ramo idiay Africa ken nagwaras iti nagduduma a pagilian a nakaapektaran pay ti Pilipinas.
Inlawlawag ni Valenzuela a maiyarngi met ti Novel Corona Virus a naggapu iti wild animal a kinnan dagiti tattao ken naiyakar kadagiti tattao idiay Wuhan City China.
Nupay kasta, binalakadan na ti publiko kangrunaan dagiti agbibiyahe iti eroplano ti naiget a panagan-annad nangruna no adda dagiti naglugan a posible a naakaran ti nasao a virus.
