LAOAG CITY – Inpakaammo ni Police Lieutenant Colonel Rafael Lero ti Chief of Police ti PNP Laoag a maipalubos ti panagkalubbon iti motorsiklo wenno kurong-kurong no laketdi dagitoy ket maibilang kas Authorized Persons Outside Residence wenno APOR kabayatan a sumrek iti Siudad ti Laoag.
Kunana a daytoy ket kalpasan a nakita da Gob. Matthew Marcos Manotoc ken Mayor Michael Marcos Keon a marigatan ti transportasyon dagiti dadduma a motorista.
Gapu iti daytoy, inbatad ni Lero palpalubusan dan ti panagkalubbon ngem masapol a maisgurado addaan da kadagiti umno a dokumento wenno requirements kas APOR ken dagiti Non-APOR sakbay da a makastrek ditoy ciudad.
Inpalagip pay ni Lero dagiti requirements a masapol nga ipakitada kadagiti checkpoints kas koma ti panagipresentar dagiti empleado ti kopya ti Work of Schedule manipod kadagiti employer da, valid company ID ken Pass Slip para kadagiti APOR idinto a Pass Slip, maysa laeng a pass slip tunggal household.
Immun-una ngem iti daytoy ket adu dagiti umili a matiktikaw no ania ti umiso a pagalagadan a masursurot seknan iti panaglubbon iti motorsiklo a sumrek ditoy Siudad ti Laoag ken naimatangan ti Bombo Radyo Laoag nga adda dagiti simrek iti Siudad ti Laoag nga adda ti nakalubbon iti motorsiklo.
