LAOAG CITY – Maipalubosen ti panagkalubbon iti motorsiklo iti ciudad ti Batac.
Daytoy ti inpakaammo ni Police Major Artemio Clemente, OIC ti Philippine National Police (PNP)- Batac.
Segun kenni Clemente, daytoy ket kalpasan nga inmandar ni Mayor Albert Chua iti nasao a ciudad ngem nasken a dagiti agkalubbon ket agkabbalay.
Inlawlawag na nga inpagunamgunam kenkuana ni Mayor Chua a saan pay laeng maipalubos ti panagbackride iti likod ti tricycle driver.
Maipalagip a saan a dagus a naipalubos ti panaglubbon iti motorsiklo iti iti nasao a ciudad no pay addan ti pammalubos ti gobierno probinsial babaen ken ni Gov. Matthew Marcos Manotoc gapu ta maiyur-uray pay laeng ti pagalagadan nga inyetnag manipod iti Inter-Agency Task Force for Emerging Infectious Diseases.
Kabayatanna, kuna na nga umaboten ti nasurok-kumurang 50 a residente iti ciudad ti natiliwanda a nagsalungasing iti saan a panagusar ti face mask.
