LAOAG CITY – Inrakurak ni Atty. Julius Balbas, Election Officer ditoy siudad ti Laoag nga apaman a mangrugi ti local campaign period ket saanen a maipalubos ti panangi-upload kadagiti campaign materials kadagiti saan a nakarehistro a social media account.
Inbatadna nga idi bulan ti Disiembre 2024 ket nangiwayat ti Commission on Elections ti panagparehistro kadagiti online platform wenno social media account a mabalin laeng a pagkampaniaan dagiti kandidato.
Inlawlawagna a no saan a nakarehistro iti Commission on Elections ti social media account a maus-usar iti panagkampania ket maibilang a panaglabsing daytoy wenno illegal campaigning.
Kunana nga adda ti Commission on Elections Resolution maipanggep iti nasao a banag a nasken a suroten amin a kandidato.
Innayonna a daytoy nga addang nga inaramid ti Commission on Elections ket tapno mamonitor dagiti kandidato ken maliklikan ti fake news.
