LAOAG CITY – Posible a mangitunda ti pannakaibayag iti panagtaray ti impeachment trial ti panagkedked ti defense team ni Vice President Sara Duterte nga i-stipulate dagiti dokumento mainaig iti saan nga umno a panagusar ti ₱612.5 million a confidential funds.
Rakurak daytoy ni House Prosecution Legal Spokesperson Atty. Benjamin “Jay” Tolosa Jr., kalpasan nga i-stipulate ti defense team ti rinibribu a dokumento a paset ti financial and liquidation records kas kadagiti acknowledgment receipts ti Office of the Vice President (OVP) ken Department of Education (DepEd).
Inbatad ni Tolosa nga iranranta man wenno saan, ti addang ti defense team ket makaapektar iti panagtaray iti panangusig ken ni Vice President Sara.
Masdaaw ni Lead prosecutor Representative Gerville Luistro no apay a saan a kayat nga ag-stipulate ti depensa uray agpada met ti dokumento ti prosecution iti dokumento ti defense.
Para met ken ni Private Prosecutor Atty. Amando Virgil Ligutan, ‘unusual’ ti rason ti depensa a mabalin a sabali dagiti dokumento nga inpresentar dagiti auditors ti Commission in Audit (COA) iti impeachment trial.
Inpetteng ni Ligutan a dagiti dokumento ti Commission in Audit auditors ket ti kapada dagiti dokumento nga insubmitir mismo ti Office of the Vice President ken Department of Education.
