LAOAG CITY – Temporaryo nga intantan ti White House ti panagkita manen da US President Donald Trump ken Russian President Vladimir Putin.
Ita kuma a lawas ti taripnong dagiti dua a lider idiay Budapest, Hungary tapno trataren ti gubat iti Ukraine.
Kas panagsagana ket ummuna nga agkita da US Secretary of State Marco Rubio ken Russian Foreign Minister Sergei Lavrov ngem nagsaritan dagitoy iti telepono.
Nagbalin met a napintas ti saritaan da Rubio ken Lavrov no sadinno inbatad ti White House a saanen a napateg nga agkita pay da Trump ken Putin iti personal.
Saan met nga indetalye ti White House ti rason ti panangitantan da ti taripnong dagiti dua a lider.
Maipalagip nga iti napalabas a lawas ket inbatad ni Trump ti manamnama a panagkta da kenni Putin, maysa nga aldaw sakbay ti panagbisita iti White House ni Ukrainian President Volodymyr Zelensky.
