LAOAG CITY – Pinatgan ni Gob. Matthew Marcos Manotoc ti apela ti Small and Medium Enterprises (SME) Office a maisardeng pay laeng ti panaglako dagiti Ministry of Micro, Small & Medium Enterprises (MSME’s) iti Pasalubong Center ti Bypass Road ditoy Siudad ti Laoag.
Daytoy ket gapo iti alisto a pannakatumba dagiti inkabil da a shelves nu napigsa ti angin.
Segun ken ni Mr. Edison Natividad, mangidadaulo ti nadakamat nga opisina, naawatan ti Gobernador ti apela da gapo ta mamati a madadael laeng dagiti produkto nu saan a natibker dagiti pakaipanan da.
Inpakaammo na nga inkarida iti Gobernador a maisubli a dagus ti panaglakoda kalpasan a maiyestablisar dagiti cubicle a pakaipanan dagiti nasao a produkto.
Mangnamnama daytoy a maestablisar iti kabiitan a panawen dagiti kasapulan a cubicle tapno makapasublidan nga aglako sakbay a madanon ti summer nga isu ti kaadu dagiti turista nga umay agpasyar ditoy Ilocos Norte.
