LAOAG CITY – Nagballaag ni P/Maj. Kristian Lee Badua, Hepe ti Piddig Municipal Police Station kadagiti pasdek negosio ken tiangge iti panaglakoda ti arak ken sigarilio kadagiti menor de edad.
Segun kenkuana, malaksid iti national law ket adda ti linteg a naiget a mangipawil a lakoan dagiti menor de edad ti arak ken sigarilio.
Inbatadna a daytoy ti maysa kadagiti pakakumikomanda iti agdama tapno maliklikan a maperdi ti masakbayan dagiti menor de edad.
Inlawlawagna a ti arak ken sigarilio ket maibilang a gateway drugs a ti kayatna saoen ket no bilang mauma dagiti menor de edad iti panaginum ken panagsigarilio ket dakkel ti posibilidadna nga agbirukda ti sabali a substance wenno chemicals kas ti marijuana wenno shabu.
Kunana a naiget ti panangkitada kadagiti paglakoan ti arak ken sigarilio pakairamanan dagiti tiendaan nangruna ket awan ti serrek pay laeng dagiti ubbing ken agtutubo kadagitoy a gundaway.
Inpalgakna a naiget pay ti panangibalakadda kadagiti nagannak a saan a babaonen dagiti annakda a mapan gumatang ti arak wenno sigarilio gapu ta maibilang daytoy a child abuse.
Mainaig iti daytoy, kuna ni P/Maj. Badua a nakikoordinarda iti Department of Social Welfare and Development, Sangguniang Kabataan, Barangay Health Workers ken Liga ng mga Barangay maipanggep iti daytoy a banag.
Kabayatanna, inpakaammona a dagiti pannusa kadagiti aglabsing iti nasao a pagalagadan ket mapaayaban dagitoy tapno agpalawag para iti first offense, agmulta para iti second offense ken maikkat ti lisensiada nga aglako para iti third offense ken mabalin pay a mapatawanda ti perpetual disqualification a maaddaan ti negosio.
