LAOAG CITY – Inpakaammo ni Mr. McDonald Bagaoisan, maysa kadagiti aglaklako ti paputok iti sirok ti Gilbert Bridge ditoy siudad ti Laoag a nakapsot pay laeng ti panaglakoda, dua nga aldaw sakbay ti panangsarabo ti baro a tawen.
Segun kenkuana, nalaklaka pay ti agdama a presio ita a tawen no maidasig iti napalabas a tawen.
Inbatadna a ti kangrunaan pay laeng a gatgatangenda kadakuada ket ti kwitis, fountain ken dadduma pay.
Kabayatanna, inlawlawag ni Bagaoisan nga iti baet nga idi pay laeng Disiembre 23 ket nakabayaddan ti lisensiada iti lokal a gobierno ngem saanda pay a napakabitan ti suplay ti kuriente.
Gapu iti daytoy, kunana a napilitanda nga agusar ti solar lights ken gimmatang ti generator tapno adda ti usarenda a kuriente nangruna iti rabii.
Inpalgakna a marigatanda iti agdama a situasionda ken adda pay ti gundaway a napanunotanda nga ipangina ti presio dagiti ilaklakoda a paputok ngem adu dagiti agriri a mapan gumatang kadakuada.
Innayonna a pinadasda metten nga indanon daytoy a parikotda iti Business Process and Licensing Office ken iti Ilocos Norte Electric Cooperative ngem awan ti tignay dagitoy.
