LAOAG CITY – Inlawlawag ni Mr. Perry Martinez, executive director ti Metro Ilocos Norte Council nga awan ti pammalubos ni Gob. Matthew Marcos Manotoc para iti panaglubbon dagiti agassawa iti maysa a motorsiklo.
Impettengna a ti pagalagadan a mangipawpawil ti “angkas” wenno panagilubbon ti motorsiklo ket manipud iti Inter Agency Task Force wenno IATF.
Mamati ni Martinez a namunganay dagiti agwarwaras a damag iti social media iti nagbalin a sungbat ni PNP Provincial Director Police Col. Christopher Abrajano iti press conference a maawatanna ti takder dagiti mangipetpetteng a rumbeng a mapalubusan dagiti agassawa nga aglubbon ti motorsiklo.
Imbatadna a segun iti PNP Provincial Director naidanon metten daytoy nga isyu iti IATF ken maiyur-uray ti takderda iti daytoy a banag.
Mainaig iti daytoy, impetteng ni Martinez a rumbeng a masurot dagiti pagalagadan nga inyetnag ti IATF.
