LAOAG CITY – Naiyalud-od manen ti panagsubli dagiti estudyante iti pagadalan idiay South Korea.
Iti report ni Bombo International Correspondent Ogin Quiena Sacoco-Jung iti Seoul, South Korea, agsubli koman dagiti estudyante ita nga aldaw ngem gapu ta adda manen dagiti nagpositibo ti virus ket naitantan pay laeng.
Inbaga ni Juna nga iti napalabas a lawas ket nalukatanen dagiti simbaan ken kapilya.
Segun kenkuana, idi Mayo primero ket napan dagiti agtrabtrabaho iti maysa a dakkel a kompanya iti lima a clubs iti Red Light Districts tapno mapan agrelax.
Nupay kasta, naduktalan nga adda ti maysa nga IT worker a positibo ti covid-19 ken isu ti nagiwaras manen ti virus iti lugar.
Gapu iti daytoy, dukduktalen dagiti otoridad amin a napan kadagiti club nangrugi iti Abril 24 agingga iti Mayo 6 tapno ipadalan dagitoy ti test.
Inpakaammo ni Jung nga umabot ti agarop 5,500 ti napan kadagiti club ken manipod iti nasao a bilang ket adda pay ti agarop 2 ribo a saan a natrace dagiti otoridad tapno dumalan da ti test.
Innayon na nga ar-aramiden amin dagiti otoridad tapno maamoan da ti lokasyon dagiti dadduma pay a napan kadagiti nasao a club.
