LAOAG CITY – Pinasingkedan ni Presidente Ferdinand Marcos Jr. a matuloy ti panaglukat ti klase inton Lunes, Hulio 29, 2024.
Ngem nu pay kasta, kinuna ti Presidente, nga italek na kadagiti management ti pagadalan ti desisyon no maituloy wenno saan ti panaglukat ti klase kadagiti divisions da, nangruna ta nalayus ti dadduma a pasdek ti pagadalan ken nadadael dagiti alikamenda.
Ngem kunana a para kadagiti saan a naapektaran iti layus ket rumbeng a maituloy ti panaglukat ti klase.
Ti direktiba ni Presidente Marcos ken ni Department of Education Secretary Sonny Angara, kunana nga aramidenna amin para iti panaglukat ti klase.
Mainaig iti daytoy, inadmitir met ti Presidente nga adda met dagiti lugar ken pagadalan a posible a mangiyalud-od iti panaglukat ti klase gapu ta naapektaran da iti layus.
Kabayatanna, mangnamnama ni Pres. Marcos a maiyaramidan ti solusyon daytoy iti babaen ti panagkikimmayyet nangruna dagiti mangidadaulo iti sektor ti edukasyon.
