LAOAG CITY – Mamati ti Department of Health nga addaan ti epekto ti climate change iti nasapa a panagngato ti kaso ti dengue ita a tawen.
Segun ken ni Department of Health spokesperson ken Asec. Albert Domingo, nasapsapa a nangrugi ti panagtutudo ditoy pagilian gapu kadagiti weather patterns kas ti shearline, ITCZ ken easterlies a masansan a mapaspasaran tunggal Hunio ken Hulio.
Nadakamat a sumagmamano a lugar idiay Metro Manila ti nangideklara ti dengue outbreak kadagiti naglabas a lawas ngem in-inoten a bumabbaba ti bilang ti mairekrekord a baro a kaso ita a lawas.
Inrakurak ti Department of Health a nababbaba ti mortality rate ti sakit ita a 2025 nga adda iti 0.36% laeng maidasig iti 0.43% iti kapada a panawen ti 2024. Kayatna a saoen, iti tunggal 1,000 pasiente, tallo agingga uppat ti matmatay.
Iti baet daytoy, naminsan manen a nagpalagip ti ahensia a nasken a saan nga agpakampante ti publiko gapu ta mabalin a ngumato manen ti kaso ti dengue no saan nga itultuloy ti panagdaldalos ken dadduma pay a panagan-annad.
Naabisoan ti publiko nga insigida nga agpakonsultar iti doktor no addaan ti sintomas ti dengue tapno maliklikan ti nakaro a kondision.
