LAOAG CITY – Inlawlawag manen ni Mr. Noel Andres, ti pannakangiwat ti Ilocos Norte Electric Cooperative (INEC) ti agtultuloy a panagngato ti singir iti kuryente.
Segun ken ni Andres, ti singir ti kuryente idi Hunyo ket P15.9868 per KWH idinto nga ita nga Hulyo ket nagbalin nga P18.6720 per KWH wenno ngimmato iti P2.6852 per KWH.
Kuna ni Andres a ti mangituntunda iti daytoy ket ti nangato a presyo ti panagangkat ti kooperatiba iti kuryente.
Inbatad ni Andres a karaman ditoy ti panagbaliw ti sukat ti piso kontra iti dolyar, panaggaraw ti presyo ti petroleum products ken panagngina ti coal.
Immunan nga inpakaammo ti opisyal a karaman a mainayun iti singir ti kuryente ket para iti generation charge manipod iti maangkat a kuryente, transmission charge nga aggapo iti NGCP ken para iti distribution utilities.
Inpetteng ni Andres nga awan met ti dakkel nga a patong kooperatiba iti singir ti kuryente malaksid ti sumrek iti distribution charges.
Mainaig iti daytoy, inbatad ni Andres a manarimaan ti panangtratar ti hunta direktiba iti nasao a banag tapno maalay-ayan ti nangato a singir iti kuryente.
Naamoan a ti nakakontrata iti INEC a pagangkatan ti kuryente ket ti San Miguel Energy.
