LAOAG CITY – Nangrugin ti panagbiahe dagiti Modern Public Utility Jeepney ditoy Ilocos Norte.
Daytoy ti inpakaammo ni Atty. Nikki Pilar ti Metro Ilocos Norte Council ti Kapitolio Probinsial.
No pay kasta, inlawlawagna a dua pay laeng a Modern PUJ ditoy probinsia ti napalubusan nga agpasada kalpasan a mannarimaan pay laeng a maipagpagna dagiti dokumento dagiti dadduma pay a driver ken operator babaen iti Ilocos Norte Transport Cooperative ken MINC.
Kunana nga umabot ti 12 agingga 15 ti malaon a pasaheros nga aglugan iti Modern PUJ ken adda dagiti markings iti nagbaetan dagiti pasaheros a mismo a ti Land Transportation Franchising and Regulatory Board wenno LTFRB ti nangikabil dagitoy tapno masurot latta dagiti maipatpatungpal a health safety protocols kas ti social distancing.
Inbagana a daytoy ket kas paset ti Modernization Program ti LTFRB ken ti Gobierno Nasional no sadino adda ti katulagan ti kooperatiba ken ti driver a ti mapasadaanna ket maited iti kooperatiba ken masueldoan dagiti driver iti 500 a pisos iti kada aldaw.
Inpakaammona nga agpada laeng ti plete a mabayadan kas iti tradional a jeepney ken maibasar iti inted ti LTFRB a fare matrix banag a saan a mabalin a sumurok ti plete a masingir kadagiti pasaheros.
Inbatadna a masukatan dagiti daan a lugan dagitoy ti baro a jeepney ngem maipanagan iti kooperatiba ken dagiti driver ken operator ti agbalin a driver ken konduktor ti modern PUJ.
Maipalagip nga agbalor ti 2,392,000 pesos ti maysa a Modern PUJ ken ti agbinulan a bayadan ti kooperatiba ket nasursurok ngem 30,000 pesos no mabayadan iti pito a tawen ngem gapu ta naiyalud-od iti sangapulo a tawen ket mabalin a maipababa ti bayadanda iti binulan.
Immun-una ngem iti daytoy, addan ti duapulo ket tallo a nakasagana a Modern PUJ ngem sangapulo ket siyam ti inaplikaranda pay laeng.
Kabayatanna, manamnama a manayunan pay ti bilang dagiti Modern PUJ ditoy probinsia iti masungsungad a bulan ngem iti agdama ket kasapulan pay nga agisubmitir dagiti maseknan ti requirements a nasken a maiproseso nga umuna sakbay nga agpasada dagitoy.
