LAOAG CITY – Adda iti 21% a peggad a maaddaan ti lymphoma cancer dagiti tattao nga agpatpa-tattoo.
Iti naisayangkat a panagsukisok dagiti eksperto, nangato ti risgo a ma-develop ti malignant lymphoma kadagiti tattao a nagpa-tattoo.
Inlawlawag dagiti eksperto a masapol nga agpanunut iti mamin-adu a daras sakbay nga agpa-tattao iti kudil.
Iti long term effect ti tattoos a naarisit ket adda iti 1,398 ti nakipaset nga addaan ti lymphoma diagnosis ken iti 4,193 a nakipaset nga awanan ti lymphoma diagnosis nga adda iti nagbaetan iti tawen a 20 ken 60, amin dagitoy ket nagsungbat iti lifestyle questionnaire maipanggep iti panagpa-tattoo.
Naammoan a kadagiti nakipaset a simmungbat iti grupo nga addaan ti lymphoma, 21% ti addaan ti tattoo idinto nga 18% nga addaan ti tattoo ti saan a na-diagnose nga addaan ti lymphoma.
Mainaig iti daytoy, ti dakkel a paset ti kudil a naikkan ti tattoo ket mabalin a mangitunda ti metal toxicity ken posible pay a makaala ti nagduduma a sakit.
Nupay kasta, basar kadagiti researcher awan ti napaneknekan nga ebidensia nga adda ti nangato a risgo ti kanser kadagiti tattao nga addaan ti dakkel a tattoo.
