LAOAG CITY – Inrakurak ti Philippine Health Insurance Corporation (PhilHealth) nga ibaklayna payen ti amin nga outpatient emergency cases iti accredited level 1 agingga iti level 3 nga ospital iti intero a pagilian iti babaen ti facility-based emergency (FBE) benefit.
Inlawlawag ti PhilHealth a saanen a kasapulan a mangala iti sabali nga akreditasyon dagiti ospital para iti facility-based emergency benefits, gapu ta karaman daytoyen ti agdama nga akreditasyon.
Nupay kasta, dagiti addaan ti extension facilities ket kasapulan nga agisumitir ti sertipikasyon iti Philippine Health Regional Office nga addaan ti nagan ken address iti kakonektar da a pasilidad.
Manamnama a ti sumaruno nga irakurak ti PhilHealth ket ti coverage para iti ambulance services iti babaen ti pre-hospital emergency benefit.
Ti outpatient emergency care benefit, a paset ti baro a napalawa a benepisyo ti PhilHealth ita a tawen ket sakupen na iti emergency services, karaman ti emergency care iti ospital ken emergency transport para kadagiti kaso nga agkasapulan iti panagpa-ospital.
