LAOAG CITY – Inpakaammo ni Bombo International News Correspondent Rene Ballenas manipod idiay Estados Unidos nga awan ti epektona iti panagpaidasig kas Presidente ni dati nga United States President Donald Trump iti nagbalin a desision ti Korte iti New York a nagbasol daytoy kadagiti amin a 34 counts iti panangpeke ti business records-na.
Segun kenkuana, daytoy ket kalpasan a nagtalinaed a naruay a tattao ti mangipapaay ken mangipakpakita ti naiget a suporta ken ni Trump iti baet kadagiti agsusukot a kaso a sangsangoenna.
Nupay kasta, inpalgakna nga adda ti posibilidad a madiskualipikar ni Trump gapu iti inyetnag a desision ti Korte ngem mabalin a saan nga agtungpal daytoy babaen iti panagapelana iti nangatngato a Korte ken panagbayad iti piyansa.
Inlawlawagna a kalpasan a nairuar ti desision ti Korte ket awan pay dagiti nangiwayat ti aniaman a tignay-protesta maipapan iti nasao a banag.
Mainaig iti daytoy, insigurado ni Ballenas nga umapela ni Trump gapu ta addaan daytoy ti umdas a kuarta, koneksion ken personalidad tapno ilaban ti kasona.
Innayonna a saan nga inpagarup ni Trump iti rimmuar a resulta ti Korte gapu ta binutbutengna dagiti jury, judge ken abugado tapno maisanud ti kaso kontra kenkuana.
