LAOAG CITY – Inlawlawag ni Ms. Jeanet Fontanilla, massage trainer iti Technical Education and Skills Development a dakkel ti epekto iti bagi ti masahe.
Kuna na a babaen iti daytoy ket maikkat dagiti lamiis ken pudot iti bagi agraman ti stress ken banbanog.
Mainaig iti daytoy, inpakaamo ni Fontanilla a sumagmamano kadagiti klase ti masahe ket thai massage nu sadino a dagiti tulang ken susuop ket mailot.
Inbatad na a maysa pay ditoy ti Swedish massage nu sadino a mamasahe ti bagi babaen kadagiti napapudot a bato.
Innayun na a ti kapatokan a klase ti panagmasahe ket reflexology massage nu sadino a dagiti timmangken a muscles ti nagduduma a paset ti bagi kangrunaan ti abaga ket mapalukneng tapno agsubli ti taray ti dara kadagiti urat.
Mainaig iti daytoy, inlawlawag ni Fontanilla a nu nalpas ti panagmasahe ket saan a mabalin ti dagus a panagdigus gapu ta ad-adda a makasusop ti lamiis ti bagi.
Innayun ni Fontanilla a dagiti saan a mabalin nga agpamasahe ket dagiti adda iti first trimester ti panagsikog na, nabartek ken dagiti kagap-gapo iti pannaka-stroke.
Kabayatanna, kuna ni Fontanilla a napateg ti panagpamasahe uray saan a kanayun tapnomabang-aran ti bagi manipod kadagiti nadadagsen a trabaho.
