LAOAG CITY – Temporaryo a nagsardeng pay laeng dagiti lima a ruta ti panagpasada iti Night Express nga inyimplementar a programa ti Gobierno Probinsial.
Daytoy ti inpakaammo ni Mr. Lauren Eman Bayangos, Administrative Aide IV iti Metro Ilocos Norte Council.
Segun kenni Bayangos, daytoy ket gapu ta nagngudon ti nailatang a pondo para iti Night Express a nausar idi bulan ti Nobiembre ken Disiembre itay napan a tawen.
Nupay kasta, inlawlawag ni Bayangos nga addanto iti maiyuswat a taripnong tapno mapagnunumoan dagiti banag a nasken a maikkan ti importansia.
Inpakaammona nga addanto pay iti maisayangkat a taripnong kadagiti Jeepney Operators and Drivers Association wenno JODA ken Tricycle Operators and Drivers Association wenno TODA pakaseknan ti Night Express.
Maipalagip a naisayangkat ti Night Express itay napan a bulan ti Nobiembre ken Disiembre itay napalabas a tawen kas kalikagum ni Gob. Matthew Marcos Manotoc nga adda pagluganan dagiti pasaheros a marabian nga agaw-awid.
