LAOAG CITY – Inpakaammo ni Rev. Fr. Melchor Palomares, pannakangiwat ti Diocese of Laoag a saan masapol a dangran ti bagi tapno ipakita ti panagbabawi kadagiti basol kas ti panagpenetensia wenno panangsaplit iti bagi kangrunaanna iti bukut ken panagpailansa iti krus.
Inpettengna a dagitoy a banag ket saanen a nasken nga aramiden dagiti tattao gapu ta inaramid mismo daytoyen ni Hesu Kristo a nangisalakan iti basol ti sangalubongan.
Daytoy ket kageddan ti pannakaselebrar ti Ash Wednesday ita nga aldaw nga isu metten ti panangrugi ti lenten season wenno kuaresma ditoy pagilian.
Segun kenkuana, ti kuaresma ket mangipasimudaag nga adda ti 40 pay nga aldaw sakbay a mangrugi ti holy week.
Inbatadna a ti Ash Wednesday ket mangipalagip kadagiti tattao a naggapu ti tapok ti tao ken agsublinto met laeng ti tapok ti tao.
Malaksid iti daytoy, ti panangselebrar ti Ash Wednesday ket mangiparipirip kadagiti tattao iti panagbabawi kadagiti nagbasolanda.
Innayonna a ti mensahe ti Ash Wednesday ket almsgiving, sacrifice ken holiness wenno ASH no sadinno a ti almsgiving ket ti panangidaton iti aniaman a banag a kabaelan nga ited iti simbaan, ti sacrifice ket kas ti fasting a malimitaran ti pannangan idinto a ti holiness ket isu ti panaglualo.
Kabayatanna, naammoan a ti dapo a mausar iti kurus-kurus ket ti dapo ti napuuran a palaspas a nausar iti napalabas a palm Sunday a daytoy nga aramid ket nagbalin a nalatak ken ar-aramiden dagiti Katoliko.
