LAOAG CITY – Naitantan ti panagpila ti Certificate of Candidacy (COC) para kadagiti agkalikagom nga agkandidato para iti Barangay and Sangguniang Kabataan Elections (BSKE) 2023 ditoy pagilyan.
Daytoy ti inbatad ni Atty. Julius Balbas, Election Officer iti Commission on Election ditoy ciudad ti Laoag.
Inlawlawag ni Balbas a basar iti inparuk-at a resolusyon ti Commission on Election ket naiyalud-od iti panagpila ti Certificate of Candidacy intono Agosto 28 agingga iti Setyembre 2 manipod iti Hulyo 3 agingga ti Hulyo 7 ita a tawen.
Kuna na a ti nagbalin a desisyon ti ahensya ket gapu paylaeng iti panawagan dagiti senador ken kongresista a maiyakar ti schedule ti panagpila ti Certificate of Candidacy gapu ta nasapa unay ti Hulyo 3-7.
Kabayatanna, iti baet a nailadladaw ti panagpila ti Certificate of Candidacy ket inpasigurado ni Balbas nga awanen ti makalapped ti pannakaiyuswat ti Barangay and Sangguniang Kabataan Elections ita a tawen.
