LAOAG CITY – Inlawlawag ni Bokal Davinci Crisostomo, ti Chairman ti Committee on Laws no apay nga ibilang da nga illegal a panagpukan ti kayo ti napasamak iti Barangay Paguludan-Salindeg iti ili ti Currimao.
Segun kenkuana, ti nasao a lugar ket maibilang a forest public land wenno sanikua ti gobierno.
Inbatad na a ti nasao a lote ket naala ti gobierno probinsyal idi gobernador pay laeng ni Senador Imee Marcos.
Kuna na nga adda ti pinirmaan a Forest Land Use Agreement ti gobierno probinsyal ken iti DENR a kayat na a sawen ket madevelop ti lugar nga isu ti nakaipatakderan ti solar power plant a maw-awagan ti MIRAE.
Naamoan nga adda ti saan a nausar ti MIRAE a paset ti lote ken plano a pagipatakderan manen ti solar plant babaen iti Nuevo Solar Power Corporation.
Nupay kasta, kuna ni Crisostomo a nasdaaw da iti papanda panagbisita iti lugar gapu ta addan dagiti agpukpukan ti kayo.
Inpakaammo ni Crisostomo a basar iti Nuevo Solar Power Corporation ket ti kontractor a binigbig na a ni Engr. Manuel Curammeng ti akin-empleado kadagiti agpukpukan ti kayo iti lugar.
Inpetteng na a maibilang nga illegal daytoy gapu ta awan pay ti inted ti Sang Panlalawigan nga otorisasyon ken ni Gobenador Matthew Marcos-Manotoc a makipinnirma ti katulagan iti Nuevo Solar Power Corporation no siasinno ti pakainaganan ti Tree Cutting Permit.
Innayon na nga idi naiyuswat ti Kic-off ceremony para iti pannakairugi ti pannakapukan dagiti 3,317 a kayo iti lugar ket karaman kadagiti bisita ket isuda Mrs. Estrella Baby Sacro, OIC ti PGIN-ENRO ken ni Mr. Vic Dabalos, DENR-PENRO.
Gapu iti daytoy, inbaga ni Crisostomo a nagaramid da ti committee report ken inikkan da ti gundaway nga agpalawag ti Nuevo Solar Power Corporation,pakairamanan da Sacro ken Dabalos mainaig iti daytoy a banag.
Inpalgak na pay a daytoy ti rason a nangiparuk-at ti cease and desist order ti gobernador tapno maisardeng ti panagpukan ti kayo iti nadakamat a lugar.
Immunan nga inreport ti Dabalos nga umaboten ti nasurok 900 a kayo ti napukan iti nadakamat a lugar.
