LAOAG CITY – Inlawlawag ni Barangay Kagawad Marvin Codreros iti Barangay 6 ditoy ciudad ti Laoag nga awan ti naireport kadakuda seknan iti panagpuor no diket ti naipadanon kadakuada ket ti panagibelleng ti basura.
Sgeun kenni Codreros, residente iti Barangay 5 ditoy ciudad ti Laoag ti nakita a nagibellleng iti bakante a lote a sakupen ti barangay da.
Ummuna iti daytoy, kuna ti kagawad a dinalusan da ti nasao a lote gapo iti naibelleng met laeng a basura ken inikkan da pay ti serra wenno barikada ngem naduktalan da nga adda ti mangik-ikkat iti daytoy.
Inbatad na a nakita da a mismo no siasinno ti nangikkat ngem saan da unay a maksarita a nasayaat gapo ta maipagarop nga adda ti deperensya iti panagpanpanunot na.
Kunana a binagaan da iti kapamilya ti nasao nga indibidwal ngem agingga ita ket saan pay a naisubli ti inserra da a galba rason a marugyan manen a pagibellengan ti basura.
Gapo iti daytoy, inbaga na met a dagus iti sekretarya iti Barangay 5 ti nasao a banag tapno maipadanon iti kapitan da.
Kabayatanna, kuna ni Codreros nga awan pay ti impormasyon na mainaig iti dimmanon a report ditoy Bombo Radyo nga adda ti nagpuor a sumagmamano a lallaki iti bakante a lote iti barangay da.
Basar iti report, naipakammo iti maysa nga opisyal ti maipagarop a panagpuor ngem maipagarop nga awan ti aksyon ken agreklamo dagiti residente gapo ta nabangsit ti asok daytoy.
Nakumpirmaran met ti Bombo Radyo nga ado ti waywaya iti nadakamat a bakante a lote.
