LAOAG CITY – Awan pay ti pagisalinan nga agsardengen ti panagpuswak ti lava, asok ken dapo ti Kilaue volcano idiay Big Island, Hawaii.
Segun ken ni Bombo International Correspondent Manny Pascua, idi kalman ket kinataripnong ti pannakabagi ti United States Geological Survey (USGS) Hawaii Volcano observatory dagiti residente iti Pahoa town tapno ipakaammo na ti kaudian a duktal da ti nasao a bulkano.
Kuna na a ti maikawalo a bettak ti nagtalinaed nga aktibo ken tuloy ti panagipuswak na ti lava nga agturong ken mangabgabor iti baybay a paset ti Lower Puna.
Kabayatan na, nawaran ti Lava Task Force a tumultulong kadagiti evacuees kageddan ti pannakaikkat dagiti dadakkel a checkpoint a naiplastar kadagiti dadakkel a kalsada.
Agtultuloy met ti panangmonitor ti Hawaii County kadagiti pagtaengan a linamot ti lava nanagnangruna iti Lower Puna.
Kuna da a ti naireport idi klaman a 668 a bilang dagiti balay a nadadael ken manamnama a manayunan iti masungsungad nga aldaw.
