LAOAG CITY – Agtultuloy ti panagrang-ay ken panangpasayaat kadagiti public health care ditoy probinsia.
Inbatad ni Ilocos Norte Provincial Health Officer Dr. Rickson Balalio a makikammayet dagiti Local Government Units iti Department of Health ken dadduma pay nga ahensia tapno ma-bridge dagiti gaps iti healthcare system ken mapasayaat dagiti pasilidad.
Segun kenkuana, babaen iti panagtitinnulong ket isu ti agbalin a tulbek tapno maragpat dagitoy.
Kunana a maragsakan gapu ta sangsangkamaysada nga agtartrabaho a mangipaay iti nangato a kalidad a ti panagtaripato iti salun-at babaen iti agtultuloy a panagsanay, pannakapasayaat ti imprastruktura ken medical technologies.
Malaksid iti daytoy, sumurok 235 a milyon ti gatad a mausar a pundo para iti pannakaipasdek ti tallo a kadsaaran a tertiary clinical laboratory, dua a kadsaaran a pasdek ti emergency room ken medical arts building iti Governor Roque B. Ablan Sr. Memorial Hospital (GRBASMH) ditoy siudad ti Laoag a manipod iti Health Facilities Enhancement Program ti Department of Health.
Inpakaammona nga hiring-da ti ad-adu pay nga staff tapno maipaay ti nasaysayaat dagiti medical care para kadagiti umili.
Kabayatanna iti panagbitla ni Gov. Matthew Marcos Manotoc, inbatadna a dagiti bakante a mabalin nga aplikaran dagiti interesado a medical specialists ket kas ti anesthesiologists, pediatricians, emergency doctors, obstetricians-gynecologists, dialysis nurses, nursing attendants, respiratory therapists, dialysis technicians ken medical technologists.
