LAOAG CITY – Nagreggaay ti daga iti Mt. Calbaryo iti ili ti Pagudpud wenno asideg iti boundary iti Cagayan.
Daytoy ti inpakaammo ni Mr. Marcel Tabije iti PDRRMO ditoy probinsya.
Kuna na a naawat da ti nasao nga impormasyon manipud iti MRDDMO iti nasao nga ili kalpasan a nagaburan ti daga ti kagudua ti national highway.
Segun kenni Tabije, ti kagudua laeng ti dalan ti mabalin a madalyasatan kalpasan ti insidente.
Binalakadan ni Tabije ti publiko nga ipabigat da iti agbiyahe gapu ta maibilang a narisgu gapu ti panagtutudo.
Awan pay ti naimaldit a nakaro a dadael ken awan dagiti naibakwit a residente gapu ti epekto ti Bagyo Carina ditoy probinsya.
Kabayatanna, napalagipan dagiti addaan ti dingwen nga ilinong da iti natalged a lugar.
Maipalagip a naruay a taraken dagiti naiyanod ken pimmusay gapu ti nakaro a kalamidad itay napan a tawen.
