Panagreggaay ti daga iti Brgy. Pancian iti ili ti Pagudpud, dakkel a problema gapo iti agtultuloy a panagtudo – Brgy. Kagawad

LAOAG CITY – Inbatad ni Barangay Kagawad Jay Z Lagundino iti Barangay Pancian iti ili ti Pagudpud nga agtultuloy ti problema da ti panagreggaay ti daga iti laksid nga adda ti temporary lane.

Daytoy ket gapo ta agtultuloy met ti panagtudo na iti nasao a lugar rason a delikado met para kadagiti maseknan ti mangwaknit iti kalsada.

Segun kenni Lagundino, no mawaknitan ti kalsada ket addan to manen ti agregeg a daga ken batbato isut gapo na a kalikagom na a maipaserra daytoy ngem ti problema ket no adda ti emergency a mapasamak.

Inpetteng na a ti mismo pay a temporary lane ket delikado gapo ta ti naaramid a pagdalanan agiti motorista ket ti mismo a naggedday a daga.

Kunana nga adda dagiti nastranded a motorista ngem adda met ti addang ti Barangay Pasaleng iti nasao nga ili a ti mismo covered court ken ti mismo Simbaan ti pagtarusan dagiti apektado.

Mainaig iti daytoy, kunana a dakkel ti posibilidad na nga adda latta ti agregreg nangruna iti parte ti nabakbak para iti maar-aramid nga slope protection.

Patien pay ni Lagundino a daytoyen ti resulta ti pannakakuti ti bantay partikular ti maar-aramid a road widening ken ti slope protection.

Inlawlawag na nga iti taripnong da idi iti DPWH ket adda ti maaramid nga alternaribo a solusyon ngem ti problema ket intultuloy da ti nababa a brace wall nga iti agdama ket ibilang na nga awan ti serbi na gapo ta naminpinsanen a nagaburan daytoy.

Kuna ni Lagundino nga agtultuloy met a naka-standby dagiti equipment ti Mayor, contractor ken ti DPWH ken aramiden da met amin ti kabaelan tapno masolbar ti agdama a paspasaren da.

Kabayatanna, inlawlawag ni Engr. Ma. Venus Torio iti DPWH 1^st Engineering District a mabalin nga agpaot pay ti proyekto a maar-aramid iti Barangay Pancian iti ili ti Pagudpud.Segun kenni Torio, adda pay dagiti critical section a saan pay a nakuti ken saan da met a makagunay no awan ti makaanay a pondo.

Nupay kasta, kuna ni Torio nga ikarkarigatan da met a maregregen dagiti delikado a banag wenno solusyonan ti nalukneng a daga.

Inbatad pay ni Torio a plano da nga ikkan ti proteksyon ti naapektaran a bantay tapno saan a masansan a mapasaran ti landslide.

Kunana pay nga adda metten ti proposed project iti daytoy no sadinno ket adda pay ti nailungalong a pondo nga umabot iti 600 ken 900 a milyon a pisos para iti nasao nga ili.