LAOAG CITY – Saan pay a mabalin a makadalyasat dagiti lugan iti national highway iti ili ti Pagudpud gapu iti agtultuloy a panagreggaay ti daga.
Daytoy ti inpakaammo ni District Engr. Maria Venus Torio, mangidadaulo iti DPWH first engineering district ditoy probinsya.
Kuna na nga adda ti agarup 10 a landslide a napasamak iti nasao nga ili gubuay iti napigsa a tudo.
Inlawlawag ni Torio nga uray mawaknitan ti kalsada ket agreggay manen ti daga rason a marigatan dagiti kameng ti DPWH ken MDRRMO iti clearing operation.
Segun kenni Torio, 24 a personnel dagiti agtrabtrabaho ken adda ti uppat nga heavy equipment nga agop-operar iti nasao a lugar.
Nupay kasta, agtultuloy ti panangipakaammo na iti probinsya ti Cagayan ti sitwasyon dagiti kalsada iti Pagudpud.
Insingasing na iti pannakatingiting dagiti bakras ti bantay tapno maikkan ti slope protection a manglapped ti panagreggaay ti daga.
