LAOAG CITY – Inpakaammo ni Brgy. Kagawad Jay-Z Lagundino iti Brgy. Pancian iti ili ti Pagudpud a namindua a nairekord ti panagreggay ti daga iti sitio Banquero iti nasao a barangay.
Kuna na nga immuna iti parbangon idi kalman rason a naiyuswat ti clearing operation.
Nu pay kasta, bayat a maiyusw-uswat ti pannakawaknit ti kalsada idi malem ket adda manen ti sabali a panagreggaay ti daga.
Inbatad na a gapu iti daytoy, ado dagiti na-stranded ken adda ti maipatto-pattok a panagtudo a napasaran iti lugar.
Kabayatanna, inpakaammo ni Lagundino nga adda ti apagapaman a panagpukaw ti supply ti kuryente iti barangay da.
Kalikagum met ti kagawad a kitaen ti LGU ti lugar gapu ta dakkel ti itunda daytoy nga alarma iti publiko kasta met kadagiti motorista a dumalyasat iti kalsada.
