LAOAG CITY – Panagreport iti PNP ti kasapulan tapno matiliw dagiti illegal nga aglaklako ti paputok.
Daytoy ti inbatad ni Police Col. Ysmael Yu, deputy regional director for operation iti Police Regional Office 1 kalpasan a nadakamat na nga awan ti matiliw nga aglako ti illegal a paputok gapu ta nakalemmeng da.
Kuna na a kasapulan a manipud iti kumunidad ti agipakaammo iti PNP tapno makapagtignay ti otoridad ken tapno adda ti matiliw.
Mainaig iti daytoy, saan a linged para kenni Yu nga adda dagiti sumagmamano a pulis a maipagarup a mangkalkalob kadagiti iligal nga aktibidad.
Inbatad na nga agtultuloy ti pannakamonitor ti integridad dagitoy.
Nagballaag ni Yu kadagiti pulis a mangkalkalob kadagiti agar-aramid ti iligal nga aktibidad a saan da nga ar-armiden amangan no maibabain ti PNP.
Iti mainaig a damag, mapagay-ayaman ti linteg ti pagilian a maipatpatungpal kangrunaan iti panagaramid ti paputok.
Daytoy ti pannirigan ni Yu kalpasan a nasalodsod kenkuana ti nasao a banag.
Inlawlawag na a pudno nga adda dagiti enforcer ken dimmalan da iti training ngem no adda iti kontrabando wenno banag a maikanniwas iti linteg ket mailusot daytoy ken saan a maidalan kadagiti maseknan nga ahensya.
