LAOAG CITY – Saan a pulos a mabannog ti pananggun-od kadagiti arapaap iti panagbiag.
Daytoy ti mangiladawan iti panagballigi ni Dr. Jericho Marlowe Ramiro iti biag.
Segun kenkuana, agtawen pay laeng daytoy iti uppat ket ti masansan nga isungsungbatna kadagiti agsalsaludsod kenkuana no ania ti kayatna a pagbalinan inton dumakkel daytoy, no sadinno maymaysa laeng ti agbalbalin a sungbatna a kalikagumna ti agbalin a doktor.
Inbatadna a nagbasa isuna iti elementaria iti Saint Andrew Grade School no sadinno a nagturpos kas Valedictorian, nagadal iti sekondaria iti Ilocos Norte National High School – Special Science Class idinto a nagbasa iti kolehio iti Far Eastern University – Nicanor Reyes Medical Foundation.
Kunana a nagturpos daytoy kas Cum Laude iti kurso a Bachelor of Science in Medical Technology.
Mainaig iti daytoy, saanna a magun-od dagiti arapaapna no awan ti naiget a suporta nga ipapaay dagiti nagannak kenkuana.
Inlawlawagna a maysa kadagiti kangrunaan a rason iti panangikagumaanna ti panagbalinna a doktor ket adu dagiti miembro iti pamiliana ti arig pasiente iti pagtaengan no sadinno ti lolona ket adda ti sakit ti pusona, pimmusay ti lolana gapu iti kanser ken dadduma pay.
Innayonna a malaksid iti pamiliana ket makitana nga adu dagiti Pilipino ti masaksakit isu a kalikagumna a matulungan dagitoy.
Kabayatanna, naammoan a ni Dr. Jericho Marlowe Ramiro ket isu ti maikadua a doktor iti pamiliana.
