LAOAG CITY – Narisgu para iti maysa a tao ti red tide gapu kadagiti toxins no maipauneg daytoy ket iti tahong.
Daytoy ti inbatad ni Dr. Alan Taylan, iti St Camillus Hospital ditoy siudad ti Laoag.
Kuna na a ti red tide wenno sobra a panagadu dagiti algae, a maibilang micro organisms wenno mikrobio, ket apektaran na dagiti shellfish.
Inlawlawag ni Dr. Taylan a mapasaran ti maysa a tao ti pannakasabidong babaen saxitoxin wenno pannakaparalisa ti maysa a tao a makapangan ti tahong.
Nasaludsod pay kenni Dr. Taylan no apay a saan a maapektaran ti red tide dagiti dadduma a nabiag iti danum, kuna na a possible a dagiti shellfish laeng ti maapektaran gapu ta isu ti kangrunaan a kankanen da dagiti algae.
Nupay kasta, awan pay ti napuutan ni Dr. Taylan nga adda ti red tide ditoy probinsya ngem ketdi adda da laeng dagiti nagsakit ti buksit na wenno nagtipus babaen ti panagsida ti shellfish, saan laeng a tahong ngem ketdi iti bisikol, unnok, birabid ken dadduma pay.
Immunan nga inreport ti Bureau of Fisheries and Aquatic Resources nga adda ti red tide kadagiti coastal waters iti Milagros, Masbate; Dauis ken Tagbilaran City iti Bohol; Dumanquillas Bay iti Zamboanga del Sur; Litalit Bay, San Benito iti Surigao del Norte; ken Lianga Bay iti Surigao del Sur.
