LAOAG CITY – Maisayangkat intono Lunes Oktubre 23 ti agmaysa nga aldaw a panagsanay para kadagiti kameng ti Provincial Disaster Risk Reduction and Management Council.
Inbunannag ni Mr. Marcell Tabije, Local Disaster Risk Reduction and Management Officer ti gobierno probinsial ti Ilocos Norte a daytoy ket mainaig iti “orientation” pakaseknan dagiti “preparedness measures”, “prevention and mitigation” ken “response capabilities” nga isayangkat ti Office of the Civil Defense.
Imbatadna a maiyuswat ti nasao a panagsanay iti mismo nga auditorium ti kapitolio probinsial.
Inlawlawagna a malaksid iti daytoy ket adda pay dagiti nakasagana a maiyuswat a panagsanay kas iti “Incident Command Training System” ken ti “Water Search and Rescue.”
Nupay kasta, kunana nga iti agdama ket awan pay ti naituding a petsa para iti pannakaisayangkat dagiti nasao a panagsanay.
