Malukatanen ti municipal quarantine area iti ili Pagudpud kalpasan a temporaryo a naipaserra gapu kadagiti nakumpirmaran a nagpositibo iti covid-19 itay kallabes.
Segun ken ni Mr. Hendrick Pedronan, mangidadaulo ti Municipal Disaster Risk and Management Office iti nasao nga ili, malimitaran iti 24 nga inidibidual ti mabalin nga agquarantine iti quarantine area.
Kuna na a naiget a masurot ti pannaka-schedule dagiti sumangpet a locally stranded individual (LSIs) ken returning overseas Filipino (ROF) agsipod ta saanda nga agakseptar kadagiti saan a nakaschedule.
Inbatad na a kalpasan ti 14 day quarantine dagiti agdama a dumaldalan iti quarantine ket dita nga agakseptar da manen kadagiti baro nga LSI wenno ROF.
Inbunnannag na a saan a pulos a maawat dagiti awan ti schedule na isut gapu na a nasken a makikoordinar kadakuada dagiti LSI ken ROF a sumangpet tapno saan a mastranded kadagiti border checkpoint.
