LAOAG CITY – Inpakaammo ni P/LT/Col Jephree Taccad, Chief Provincial Operation Management Unit iti Ilocos Norte Police Provincial Office maibilang a generally peaceful ti panangsarabo ti baro a tawen ita 2025 ditoy probinsia.
Basar iti datos a naireport kadakuada ket umabot iti 6 nga indibidual ti napaputokan ti paputok ditoy probinsia, maysa manipud iti Bacarra, tallo manipud iti Dingras ken maysa manipud iti Piddig, ken maysa manipud iti ili ti Dingras ken maysa manipud iti ili ti San Nicolas.
Mainaig iti daytoy, uppat ti nairekord nga menor-de-edad ti naputokan ti paputok ket kiniddawna kadagiti nagannak nga agbalin daytoy a kas maysa nga adal parakadakua para inton panagsarabo iti sumaruno a tawen.
Innayonna nga umabot met iti 331 a boga ti nakumpiskar ti dagiti otoridad, idinto nga umabot iti 32,000 ti nakumpiskar nga illegal firecrackers manipud iti ili ti Carasi, Paoay, ken iti ili ti Dingras ditoy probinsia.
Nupay kasta, iti laksid nga adda ti nairekord ti Provincial Health Office nga umabot iti 8 a firecracker related injuries ket agtultuloy ti pakikoordinarda iti umili tapno maireport ken ma-validate dagitoy a nadakamat nga insidente iti opisinada.
Kabayatanna, kuna ni Taccad nga agtultuloy ti panagmonitor da kadagiti baybay, dam, ken dadduma pay a pagturungan dagiti umili tapno agdidigos tapno maliklikan ti insidente a mabalin a mapasamak.
