LAOAG CITY – Patien ni PMaj. Joseph Tayaban, ti hepe ti PNP-Badoc a mapalubusan laeng a sumrek ditoy probinsya dagiti Locally Stranded Individual (LSI) ken Returning Overseas Filipino (ROF) iti kanito a bumaba ti kaso ti covid-19 ditoy probinsya.
Nu pay kasta, kuna ni Tayaban nga agdepende ken ni Governor Matthew Marcos Manotoc ti desisyon mainaig iti panagserrek ti LSI ken ROF.
Mainaig iti daytoy, inbatad na a nakasagana iti biang ti PNP ken dadduma pay nga agserserbi kas frontliners a mangsabat kadagi LSI ken ROF apaman a mapalubusan a sumrek dagitoy ditoy probinsya.
Maipalagip a ti saan a panagpastrek ti ROF ken LSI ket gubuay ti agtultuloy a panagngato ti kaso ti covid-19 kageddan ti pannakaipatungpal ti ECQ.
